Ձեր վստահելի աղբյուրը

 Ադրբեջանական լրատվամիջոցների հաղորդմամբ, Հայաստանի քաղաքացու կողմից հայ-­ադրբեջանական սահմանի հատման փաստ է արձանագրվել:

Ըստ «ԱՊԱ» լրատվական գործակալության, Ադրբեջանի Պատանդների, անհայտ կորածների և գերիների հանձնաժողովի քարտուղար Շահին Սայիլովը հայտնել է, որ մոտ 65-­ամյա Հայաստանի (Խոջայան Մամիկ Տիգրանի) քաղաքացուն գետն անցնելիս Թովուզի շրջանի Ալիբեյլի գյուղի բնակիչները նկատել ու հանձնել են ադրբեջանցի զինծառայողներին:

Ըստ աղբյուրի, դեպքը գրանցվել է 16.00­-ի սահմաններում: Ադրբեջանի ՊՆ մամուլի ծառայությունից հայտնել են, որ վերջինս «հայկական դիվերսիոն խմբի անդամ է և եղել է զինված»:

ՀՀ պաշտպանության նախարարի մամուլի խոսնակ Արծրուն Հովհաննիսյանը Panorama.am-­ին հաղորդեց, որ հայ-­ադրբեջանական սահմանի այդ հատվածում տեղակայված մարտական դիրքերից որևէ զինծառայող չի բացակայում, հավելելով, որ եթե նույնիսկ մարդ է հատել սահմանը, ապա նա զինծառայող չէ:

Panorama.am­ը փորձեց կապ հաստատել նաև սահմանամերձ գյուղերի գյուղապետերի հետ` փորձելով ճշտել, թե արդյո՞ք տեղեկատվություն ունեն վերոնշյալի վերաբերյալ:

Վերին Կարմիր աղբյուր գյուղի գյուղապետը մեզ տեղեկացրեց, որ իրենք գյուղում «նման անուն ազգանունով մարդ ունեն ու հիմա նա գյուղում չի, իրենք զբաղված են վերջինիս փնտրտուքով»:  Խոստացավ մանրամասներ հաղորդել ավելի ուշ:

Panorama.am­-ը կապ հաստատեց նաև ոստիկանության տեղեկատվության և հասարակայնության հետ կապերի վարչության ներկայացուցիչ Արմեն Մալխասյանի հետ, պարզելու, թե արդյո՞ք լուր  ունեն Տավուշի սահմանամերձ գյուղերից որևէ մեկում անհետ կորած քաղաքացու մասին:

Վերջինս տեղեկացրեց, որ այս պահի դրությամբ, Վերին Կարմիր Աղբյուր գյուղում փնտրում են Մամիկոն Տիգրանի Խոջոյանին (ադրբեջանական աղբյուրները հաղորդել էին` Խոջայան Մամիկ Տիգրանի), ում վերջին անգամ տեսել են 14.00­-15.00­-ի սահմաններում` «Քառասունքի» արարողության ժամանակ:

Ա. Մալխասյանի տեղեկացմամբ, Մ. Խոջոյանը երեք որդի և երեք դուստր ունի, սակայն բնակվել է միայնակ:

Ոստիկանությունից նաև հայտնեցին, որ վերջինս առողջական խնդիրներ է ունեցել (հոգեկան) և վերջին 2-3 տարիներին հաշվառված է եղել ու գտնվել բժիշկների վերահսկողության տակ:

Ավելի ուշ Ա. Մալխասյանից տեղեկացանք, որ գյուղում ոստիկաններին հաջողվել է պարզել, որ գյուղի հովիվներից մեկը Խոջոյանին (ծնված 27.11.37 թիվ) տեսել է սահմանի Մաֆլար կոչվող վայրում (սահմանից մոտ 2.2 կմ հեռու):

Չնայած մառախլապատ եղանակին, Խոջոյանը նշել է, որ գնում է մոշ քաղելու. դրանից հետո, վերջինիս ոչ մեկ այլևս չի տեսել:

Ադրբեջանական «Հաքքին.ազ» լրատվական կայքը միջադեպի առնչությամբ լուսանկարներ է հրապարակել, որոնք կայքին են փոխանցել Ալիբեյլի գյուղի բնակիչները:

Այս կապակցությամբ Ա. Մալխասյանը նշեց, որ Խոջոյանին վերջին անգամ տեսնողները հաստատում են` վերջինս այնպիսի հագուստներ է կրել, որոնք ներկայացված են ադրբեջանական լուսանկարում:

Նկատենք, որ 77­-ամյա մեծահասակ, առողջական լուրջ խնդիրներ ունեցող ՀՀ քաղաքացուն Ադրբեջանի ՊՆ-­ն ներկայացրել է որպես դիվերսանտ: